This website adopts the Web Content Accessibility Guidelines (WCAG 2.0) as the accessibility standard for all its related web development and services. WCAG 2.0 is also an international standard, ISO 40500. This certifies it as a stable and referenceable technical standard.

WCAG 2.0 contains 12 guidelines organized under 4 principles: Perceivable, Operable, Understandable, and Robust (POUR for short). There are testable success criteria for each guideline. Compliance to these criteria is measured in three levels: A, AA, or AAA. A guide to understanding and implementing Web Content Accessibility Guidelines 2.0 is available at: https://www.w3.org/TR/UNDERSTANDING-WCAG20/

Accessibility Features

Shortcut Keys Combination Activation Combination keys used for each browser.

  • Chrome for Linux press (Alt+Shift+shortcut_key)
  • Chrome for Windows press (Alt+shortcut_key)
  • For Firefox press (Alt+Shift+shortcut_key)
  • For Internet Explorer press (Alt+Shift+shortcut_key) then press (enter)
  • On Mac OS press (Ctrl+Opt+shortcut_key)
  • Accessibility Statement (Combination + 0): Statement page that will show the available accessibility keys.
  • Home Page (Combination + H): Accessibility key for redirecting to homepage.
  • Main Content (Combination + R): Shortcut for viewing the content section of the current page.
  • FAQ (Combination + Q): Shortcut for FAQ page.
  • Contact (Combination + C): Shortcut for contact page or form inquiries.
  • Feedback (Combination + K): Shortcut for feedback page.
  • Site Map (Combination + M): Shortcut for site map (footer agency) section of the page.
  • Search (Combination + S): Shortcut for search page.
  • Click anywhere outside the dialog box to close this dialog box.

    Message of Vice President Leni Robredo at the Groundbreaking Ceremony of Angat Buhay Village

    Brgy. Sagonsongan, Marawi City

    delivered on 06 March 2018

    Maraming salamat po. Maupo po tayong lahat.

    Bago po ako magpatuloy, pagbigay-galang muna po sa mga opisyal na kasama po natin ngayong umaga, sa pamumuno ng ating minamahal na vice governor, Vice Gov. Bombit Adiong, magandang umaga po; Mayor Majul Gandamra ng Marawi; nandito din po, Mayor Ali Sumandar ng Piagapo; Asst. Sec. Felix Castro Jr. ng Task Force Bangon Marawi. Nandito din po, Maj. Gen. Rosseler Murillo, Commander ng 1st ID (Infantry Division); B/Gen. Arnold Fernandez, Commander ng 54th Engineering Brigade; Col. Generoso Ponio, Brigade Commander ng 103rd Brigade; Col. Romeo Brawner, Deputy Commander, Joint Task Force Ranao; of course, Fr. Bobby Yap, SJ, ng Xavier University-Ateneo de Cagayan, Engr. Luzviminda Sani, District Engineer ng DPWH (Department of Public Works and Highways) ARMM (Autonomous Region in Muslim Mindanao); Brgy. Captain Omar Abdullah Macabada ng Brgy. Sagonsongan, saka iyong buong council ng barangay; iyong iba pa pong city officials ng Marawi; iba pang provincial officials ng Lanao del Sur; iyong atin pong mga Angat Buhay partners; minamahal ko pong mga kababayan: Magandang, magandang umaga po sa inyong lahat. Ayon. Magandang umaga.

    Ito po ay araw ng pasasalamat—araw ng pasasalamat dahil sa ilang buwan pong pabalik-balik kami dito sa inyo sa Marawi saka sa Lanao del Sur, iyon iyong mga buwan ng pangamba. Iyon iyong mga buwan na lahat tayo nalulungkot. Pero ngayon po na tapos na iyong ating hinarap na matinding pagsubok, nakakatuwang isipin na gaya nga ng sinabi po ni Fr. Bobby Yap, ito ay true bayanihan spirit—nangyayari po iyong ating okasyon ngayon dahil sa pagtutulungan ng napakaraming mga sektor, hindi lang ng pamahalaan kundi lalong lalo na ng pribado.

    Pero siguro po, kaunting pagbabalik-tanaw muna kung paano nag-umpisa iyong partnership ng aming opisina at ng Provincial Government ng Lanao del Sur at ng City Government ng Marawi. Mga dalawang buwan bago sumiklab iyong labanan, nandito po kami sa Marawi. Kung naaalala po ni Vice Gov saka ni Mayor, nag-launch po tayo ng Angat Buhay para sa Lanao del Sur. Pumili po tayo ng 16 na local government units na tututukan ng tulong ng Office of the Vice President.

    In fact, pagkatapos po ng ating launch, dito po sa Marawi mayroon na po tayong in-adopt na isang barangay, iyong Barangay Dayawan. Iyong atin pong women weavers doon—hindi ko alam kung nandito sila ngayong umaga—pero iyong ating women weavers, inumpisahan na po natin silang tulungan. Actually, dalawang araw bago sumiklab iyong laban dito sa Marawi, nandoon po sila sa aming opisina sa Maynila dahil nagtanggap po sila ng tseke, nagtanggap sila ng tulong galing sa Metrobank Foundation. Tulong iyon para sa kanilang livelihood, tulong para makapag-umpisa silang buhayin muli iyong weaving sa Barangay Dayawan. Pero hindi pa man po sila nakakabalik dito sa Marawi, sumiklab na iyong laban.

    Kaya imbes na maumpisahan natin nang tuloy-tuloy iyong tulong natin sa kabuhayan, iyong tulong natin sa iba pang pangangailangan, nag-concentrate na po iyong ating efforts sa relief operations dito. At nagpapasalamat po kami sa Xavier University-Ateneo de Cagayan kasi dalawang araw lang po matapos sumiklab na una, nagkaroon na po kami ng partnership. Doon po kami nag-headquarters sa Xavier University; iyong team ng Office of the Vice President nandoon na po, Father, sa inyo, at magkatuwang tayong bumabalik-balik dito sa Marawi para ihatid iyong iba’t ibang klaseng tulong. At iyong iba’t ibang klaseng tulong pong naihatid natin, gaya din ngayon, karamihan doon ay tulong galing sa private sector.

    At iyon po ay dahil siguro alam naman po ninyong lahat na ang aming opisina, isa sa pinakamaliit na budget sa burukrasya, kaya marami po kaming mga limitasyon. Pero iyong tulong na natatanggap natin mula sa private sector ang talagang nagpapagulong ng ating maraming partnerships dito po sa inyo.

    Bago po kami pumunta dito sa Barangay Sagonsongan, magkakasama po kami nina Vice Gov doon po kina Mayor Ali sa Piagapo dahil nagbigay din po kami ng mga gamit para sa kanilang mga abaca farmers doon, para sa kanilang livelihood. At pagkatapos po dito, lilipat kami sa Saguiaran, magbibigay din po kami ng mga makina para sa mga kababaihan na IDPs (internally displaced persons) doon, para mayroon na silang hanapbuhay habang bumabangon muli.

    Pero isang malaki at napakagandang kuwento itong Angat Buhay Village. Bibigyan ko din po kayo ng kaunting background. Marahil ay hindi din po lingid sa inyong kaalaman na pagkatapos po ng eleksyon ay nagkaroon ako ng kaso sa Supreme Court. At iyong kaso ko po sa Supreme Court, may malaking halaga na kailangan kaming ideposito sa Supreme Court, at hindi po namin nabubuo iyong aming idedeposito. Kulang pa po kami ng mga 7 million pesos. Hindi po namin kayang i-raise iyong perang iyon, at mayroon pong isang grupo ng mga kababaihan iyong gustong tumulong sa akin. At iyong grupo pong iyon, ang iba sa kanila ay kasama natin ngayong umaga. Sila po iyong nakaisip na tulungan tayo at mag-fundraise, para matulungan na mayroon tayong madeposito sa Supreme Court. Hindi ko po alam kung ilan sa kanila ang nandito, pero hayaan niyo po akong batiin at makilala niyo po ang iba sa kanila na kasama natin ngayon.

    Iyong nag-umpisa po—anim silang kababaihan na nag-umpisa noong kampanya para matulungan tayo. At iyong anim pong iyon: pinapangunahan po ni Ms. Nina Lim Yuson, na chairman—founder—ng Museong Pambata, nandoon po siya; former Pag-IBIG Fund chief executive officer Zoraida Amelia Alonzo, nandito rin po siya; siyempre kilalang-kilala po natin at mahal na mahal natin siya, former DSWD Sec. Dinky Soliman. Hindi ko po alam kung nandito siya ngayon, former Human Rights commissioner Pauline Sicam. Nandito po ba siya ngayon? Hindi siya kasama. At iyong pang-anim po, iyong—panlima pa lang pala—iyong panlima po, kilalang-kilala, isang sikat na singer, Ms. Celeste Legaspi. Kasama po—hindi po siya kasama ngayong umaga, pero kasama siya doon sa naunang anim. At iyong pang-anim, Ateneo de Manila University Press director Karina Bolasco. Sila po iyong nag-umpisa.

    Nag-umpisa po silang mag-raise ng pondo, pero iyong nakakatuwa po nito kasi iyong mga nagbibigay na kontribusyon ay hindi lahat galing sa mayayaman na pamilya. Napakarami pong nag-contribute sa pondong iyon na mga ordinaryong tao, simpleng-simple, na sila din nangangailangan. Pero sa pangangailangan nila, naisip nilang magbigay pa din. Ang kuwento po nila sa amin, mga 25,000 na tao, mga 25,000 na tao iyong nagbigay ng kontribusyon—karamihan nito, mga 100 pesos na contribution.

    Ang ilan po na naikuwento sa amin ay iyong kuwento ni Adrian. Si Adrian ay isang bata na—hindi pala siya bata. Si Adrian ay isa sa ating mga supporters na nag-iipon siya para sa kaniyang open heart surgery. Nag-iipon siya, pero kahit kailangan na kailangan niya din ng pera, nag-contribute siya.

    Ang isa pa po doon, isang napakasimple lang, si Bong. Si Bong ay isang taga-Bolinao, Pangasinan. Galing po siya sa isang isla. Ang kuwento niya, namasahe pa siya, nagbangka, para pumunta sa bayan para maghulog ng G-cash, para lang makapag-contribute.

    Mayroon po si Tina, isang bata pa na young professional, na nag-iipon para sa kaniyang biyahe, pero iyong kaniyang inipon ay kaniya pang ikinontribute.

    Ilan lamang po ito sa mga kuwento noong mga taong nag-contribute. Pero sa kasamaang palad po, hindi po namin matanggap iyong naipon na pondo kasi bilang Pangalawang Pangulo, bawal po akong tumanggap ng donasyon. Ang ginawa ng “Piso Para sa Laban ni Leni”, nag-petition po sila sa Korte Suprema na tanggapin nila. Iyong naipon po nila, 7.4 million pesos.

    Pero iyong kanilang petisyon po sa Supreme Court, hindi rin napagbigyan, kasi parang donasyon din po iyon para sa amin. Iyong sa amin po, masama iyong aming loob para doon sa mga simpleng taong kailangang-kailangan iyong sarili nilang pera, pero ibinigay pa para makatulong sa amin. Ang sabi po ng “Piso Para sa Laban ni Leni”, iko-contribute na lang po nila iyong kanilang naipon para sa aming Angat Buhay program.

    Noong kami po nag-usap-usap, sabi po namin, sana iyong mapuntahan ng perang ito, isang bagay na talagang kailangan na kailangan. Sana iyong mapuntahan nitong perang ito, isang bagay na mararamdaman noong bawat isang nag-contribute, na napunta sa maayos, napunta sa isang mahalagang bagay iyong kanilang naiambag. At naisip po namin itong Angat Buhay Village.

    Kaya ngayong araw po, isa po itong selebrasyon—selebrasyon ng pagbabayanihan, selebrasyon ng pagtulong-tulong, selebrasyon ng pagkakaisa. Nasa pamahalaan ka man o pribado kang tao, wala ditong tinitingnan na pulitika, walang tinitingnan na relihiyon, walang tinitingnan na kulay. Pero tinitingnan po natin dito, lahat tayo tinitingnan natin iyong ating mga kapatid dito sa Marawi na nangangailangan ng ating tulong, lalong lalo na sa panahon ngayon.

    Kaya naisip po namin, nakipag-meeting po kami sa Provincial Government of Lanao del Sur, sa City Government of Marawi, sa Task Force Bangon Marawi, sa Xavier University, pati na po sa ARMM (Autonomous Region in Muslim Mindanao) Government, para mabuo itong village na ito. Kaya nagpapasalamat po kami, unang-una po kay Mayor Majul Gandamra, sa kaniya pong tulong na mapahiram po sa atin nang ilang taon itong lupang ito para mapagtayuan ng ating mga kabahayan. Nagpapasalamat po tayo sa ARMM Government, na sila po iyong namahala sa land preparation at iyon ay minadali din natin—minadali natin gaya ni Fr. Bobby, istrikto po kami sa oras—kasi alam po natin na iyong ating mga IDPs ay kailangan na kailangan na mayroon nang bahay na matirahan, kasi medyo matagal na din sila sa evacuation centers.

    Pero gaya po ng sabi ni Fr. Bobby, ayaw po natin na basta bigyan lang sila ng bahay na matitirhan. Unang-una po, iyong ating bahay na—mayroon na po tayong model unit, na minadali din natin; maraming salamat sa ating contractor, iyong Metro Stonerich Corporation, na ilang araw yatang walang tulog iyong kaniyang mga tao para lang mahabol ito. Ito, kapag napasok po natin mamaya, kumpleto na po ito: mayroon na po siyang kisame, iyong kaniyang banyo ay na-tiles na. Talagang tao na lang iyong kulang tumira.

    Pero ito po, iyong—isa po sa mga siniguro natin, at iyon po iyong pinangako sa atin ng city government, na bago pumasok dito iyong ating mga pamilya, mayroon na silang kuryente at mayroon na silang tubig. At nagpapasalamat po tayo sa Task Force Bangon Marawi, at sasagutin po ng Task Force Bangon Marawi iyong tubig for the first six months, tapos 200 pesos per month na bayad sa kuryente for the first six months din. Tama po ba, Asec? Tama din.

    Ang atin pong pangarap… ang atin pong pangarap ay makapatayo sana tayo ng 100 na kabahayan. Pero ang sabi po ng Xavier University, at ang sabi po ng ating contractor, ang kaya pa lang nilang matapos by June, 60 pa lang muna, kaya iyong target namin by June 12, mayroon nang 60 na ready for occupancy, tapos mayroon pang 14 na ihahabol. Ang problema lang po natin, mukhang 74 pa lang iyong kasya sa ating lupa. Hindi pa kaagad maa-accommodate iyong 100, pero basta sige lang po iyong pag-construct, maaabot din natin iyong 100 na target.

    Pero iyong ipapasalamat po natin kasi iyong 60 po na mga kabahayan, iyon po ay iyong 58 noon ay sagot ng Piso Para sa Laban ni Leni. Kaya palakpakan po ulit natin sila. Iyong dalawa, sagot ng—pasensya na po kayo at…—Sigma Delta Phi Southern California Alumni Association, iyon po iyong mga Pilipino na nasa Southern California; nagpadala din po ng pera para sa dalawang units ng bahay. At ang isa po, iyong akin pong mga kaklase noong college—nandito din po sila ngayon—ang tawag nila sa sarili nila “Vice Squad,” kasi mga squad sila ni Vice. Nag-promise din po sila ng dalawa hanggang limang bahay, nandito po sila. Iyong amin pong partner, Solanaland, nag-pledge din po—nandito din po iyong Solanaland—nag-pledge po sila ng 2 million pesos para din po dito.

    Iyong RAF Forwarding—nandito din po si Ms. Judith ng RAF Forwarding; Judith, tayo ka naman. Pinapatayo ko po si Judith kasi mula umpisa, katulong na po namin sila sa pag-transport ng goods dito, sa lahat na pangangailangan dito. Nag-pledge din po iyong RAF ng masjid. Iyong masjid po para sa community na ito, pinledge na po ng RAF Forwarding. Saka mga shelter units—five shelter units.

    Ito po iyong sinasabi ni Fr. Bobby kanina na ayaw po natin na magtayo lang ng mga bahay, pero gusto natin sana self-contained iyong community. Mayroon po dito sa loob—makikita niyo po sa plano—bahagi na po ng plano iyong masjid dito sa loob, Mayroon din po tayong community center, at doon po sa community center, mayroon po tayo doong toy library. Nandito po iyong head ng Philippine Toy Library, Mr. Edsel Ramirez; palakpakan po natin siya. Magtatayo po tayo ng toy library para sa mga batang titira dito. Mayroon po tayong mga temporary learning centers na galing sa Church of the Latter-Day Saints, in cooperation with DepEd, Department of Education. Magkakaroon po tayo ng livelihood center para sa mga kababaihan, at again, iyong livelihood center po, pagtutulung-tulugan din ng Latter-Day Saints [Charities], ng Negrense Volunteers for Change—nakita ko po si Ms. Mariel Tolentino, nandito po siya, palakpakan po natin—at ng iba pa po nating partners.

    Iyong mga nakaraan po, mayroon pong… nag-provide po tayo ng gamit para sa temporary learning centers—mga upuan, mga lamesa, mga school kits. Galing po iyon sa Uratex saka sa Children’s Hour.

    Marami po akong pasasalamatan; pasensya na po kayo, mahaba-haba po ito. Ang panaginip din po natin, gaya ng ginagawa ng Xavier University, na mayroong mga vegetable gardens, ano? Mayroong mga vegetable garden area, kaya medyo maluwag po ang space na nakapaikot sa ating mga kabahayan. Sa tulong din po iyan ng Xavier University.

    Noong panahon po na mayroon pa pong labanan dito, marami din po tayong nahinging… nagpadala ng tulong, gaya po ng Tzu Chi Foundation, gaya ng International Care Ministries, Kaya Natin Movement. Pati po iyong City Government of Naga, kasama po natin minsan—November po yata iyon, ano, Mayor? Noong November, kasama po natin iyong City Government of Naga para magbigay din po ng tulong. Iyong mga community kitchens po na ginawa natin sa mga evacuation centers, iyong partner po natin doon ay Operation Compassion. Iyong mga health services—nagbigay po tayo ng mga water filters, ng mga hygiene kits, mga tsinelas—galing po iyon sa PGH, sa Physicians for Peace, at ano din, kina Ma’am Nina, sa TOWNS Foundation. Nabanggit ko na po kanina, iyong Metrobank Foundation tumutulong sa atin sa livelihood [assistance].

    At ito pong mga partners na ito, habang ginagawa natin iyong community na ito, at habang nakatira sa community na ito [ang mga beneficiaries], patuloy pa din na tutulong.

    Excited po tayo. Excited po tayo na mabuo na iyong buong community. In fact, may presentation po sana iyong—hindi ko pa pala name-mention iyong pinakamahalaga sa lahat: United Architects of the Philippines – [Quezon City] Elliptical Chapter. Iyong pinakaimportante. Nandito po si Arch. Peach Buencamino saka si Arch. Siena. Palakpakan po natin. Ayan. Nakatira na po iyan dito sa inyo. Dito na po iyan parati sa Marawi. Mayroon po sana silang napakagandang presentation, ano, Arch. Peach? Napanood ko iyong presentation, kaya lang masyado daw pong maliwanag ngayon, hindi kayang mapanood. Pero iiwan po namin, Mayor, iiwan po namin, Vice Gov, iyong presentation na ginawa ng United Architects para makita niyo kung ano iyong pinapangarap natin—na sa June, ganoon na iyong ating makikita.

    Isa lang po iyong mensahe sa lahat: na sa oras ng kagipitan, hindi ito panahon na tayo ay nagkakawatak-watak. Sa oras ng kagipitan, ito iyong panahon na tayo ay nagkakaisa, dahil kapag tayo po ay nagkakaisa, lahat na imposible, puwedeng maging posible. At ito iyong gusto nating mensahe para sa ating mga kababayan dito sa Marawi, na ngayon na kayo iyong nangangailangan, nandito po kami para sa inyo. Na sa oras po ng kagipitan, kung anuman na maliit na tulong iyong puwede naming iambag, iaambag po namin sa inyo, para lang kahit paano makagaan sa kabigatan na inyong dinadala.

    Alam po namin na iyong 100 bahay, wala pa din ito sa pangangailangan ninyo, pero tingin ko po mas mahalaga dito iyong mensahe… iyong mensahe na marami pong nagmamalasakit sa inyo. Maraming nagmamahal sa inyo. Iyong mga ordinaryong tao, kahit gaano pa nangangailangan, parating may maitutulong. Kaya ito po… ito po iyong aming regalo. Hindi po ito galing sa opisina namin, pero ito po ay galing sa mga kababayan natin na nagmamahal po sa inyo.

    Kaya iyong atin pong pasasalamat, iyong atin pong pasasalamat sa local government ng Lanao [del] Sur sa lahat po ng tulong na ibinigay sa atin, local government ng Marawi, sa ARMM government. Siyempre po sa ating partner, hindi lang po Xavier University – Ateneo de Cagayan, pero iyong ating local NGO partner din, iyong Al-Mujadilah Foundation. Hindi ko po alam kung nandito sila ngayon; sana po nandito sila kasi mula din po umpisa—mula sa umpisa—sila din po iyong katuwang natin sa pagbibigay-tulong dito sa inyo sa Marawi.

    Maraming, maraming salamat po. Magandang umaga pong muli sa inyong lahat!

    Posted in Speeches on Mar 07, 2018