Visit to the victims of Iloilo-Guimaras Sea Tragedy
Jordan Municipal Hall, Jordan, Guimaras Province  

Maraming salamat! Magandang hapon po sa inyong lahat. 

Bago po ako magpatuloy, pagbigay-galang lamang sa mga officials na kasama po natin ngayong hapon sa pangunguna po ni Mayor Corpus—Mayor Ruben Corpuz ng Jordan [applause]; Mayor Annabelle Vilches [applause]; Mayor Emmanuel Galila [applause]; Vice Mayor Totong Infante [applause]; Vice Mayor Dela Cruz [applause]; Vice Mayor Bebeth [applause]; sa inyo pong lahat; mga iba pa pang mga kapareho ko pong nagta-trabaho sa gobyerno; iyong atin pong mga survivors; mga pamilya ng mga nawalan; magandang magandang hapon po sa inyong lahat. Maayong hapon sa tanan. 

Hanggang doon lang po iyong alam ko. Pero nakakaintindi po ako ng Ilonggo kasi iyong Ilonggo, napakalapit sa Bicol, ano. Mas masungit lang daw iyong Bicol. Ang Ilonggo, mas malambing. 

Pero isa pong… pangalawang pagkakataon ko po rito sa Guimaras, per isang malungkot—isang malungkot na okasyon na pagpunta. Sinadya—siniguro ko pong makakatawid ako bago ako pumunta kasi gusto ko pong sadyain kayo.

Alam niyo po iyong pagkawala ng mga mahal niyo sa buhay, iyong mga nawalan, malapit din po iyong kuwento sa pagkawala ng asawa ko. Kung naaalala po ninyo—siguro nabasa ninyo sa balita—noong magpi-pitong taon na pong nakaraan, August din nangyari—August 18 po nangyari. Noong bumagsak iyong eroplano na sinasakyan ng asawa ko, bumagsak po siya sa dagat at tatlong… tatlong araw—tatlong araw na hindi nakita iyong kaniyang katawan. Kaya alam ko po iyong dalamhating pinagdadaanan niyo. Ganoon din po sa… ganoon din po sa aming pamilya. Iyong nagsisimula sa ‘pag una mong marinig iyong balita, umaasa ka…umaasa kang may milagro na mangyari. 

Iyong sa amin po noon, tatlong araw wala iyong asawa ko, para pong roller coaster iyong nararamdaman namin. Isang oras, sasabihin sa amin na nahanap na; isang oras, sasabihin sa amin may nakasalba raw na mangingisda sa asawa ko; mayroong nagsasabi na nasa isang isla. Pero pangatlong araw, nahanap iyong kaniyang katawan. Wala na. At siyempre, dahil pangatlong araw, iba na iyong kondisyon ng kaniyang katawan. 

Alam ko po iyong pinagdadaanan niyo. Napakahirap pong… napakahirap. Parang ayaw mo ito—kahit sa kaaway mo—ayaw mong… ayaw mong mangyari… mangyari ito. [Guimaras Gov. Samuel Gumarin arrives] Ay, good afternoon po. Magandang hapon po sa inyo, Gov. Palakpakan po natin si Gov. [applause

Kaya noong nabalitaan ko po iyong trahedya, sinabi ko po sa aking staff na kahit mahuli kami nang pagpunta basta sigurado kaming makakatawid dito sa Guimaras para kahit papaano… Alam ko po na mahirap maibsan iyong bigat, ‘di ba. Hindi natin inaasahan. Kanina po nakiramay ako doon sa mga pamilya noong mga nawalan. Galing po ako sa isang pamilyang apat na miyembro iyong pamilya—iyong isang lola at saka tatlong apo iyong nawala. Hindi ko po lubos maisip kung gaano kasakit iyon. Ako, isa lang iyong nawala sa amin pero parang gumuho iyong aming mundo. Alam ko po na pareho rin iyong nararamdaman niyo. 

Pumunta po kami ngayong hapon para makiramay, para magbigay ng kaunting tulong kahit alam po namin na kahit anong tulong, parang hindi nakakawala ng sakit na nararamdaman namin. Pero gusto lang po naming ipaalam sa inyo na kami po, nakikiramay. Magiging mahirap iyong susunod na araw. Naalala ko po noong asawa ko, iyong pinakamahirap iyong pagkatapos malibing. Iyong pinakamahirap pagkatapos malibing kasi parang hinaharap mo na iyong buhay na wala iyong mahal mo sa buhay. 

Pero gusto po naming ipaalam sa inyo na sa pagharap niyo ng mga mas matitinding kahirapan pa, nandito lang po kami. Kung ano po iyong matutulong namin, huwag pong magdalawang-isip na ipaabot sa amin. Alam ko po na si Gov, iyong ating mga mayors, iyong ating mga municipal officials, nandito parati para tugunan iyong ating mga pangangailangan. Pero iyong opisina po namin, handa ring tumulong para mapagaan iyong dala-dala niyo ngayong hapon.

Wala naman po kaming ibang sadya kundi… galing po sa isang biyuda na kagaya ko na nawalan din, iyong amin pong pakikiisa sa pighati, sa dalamhati na pinagdadaanan niyo ngayon. 

Gov, maraming salamat po. Sa atin pong mga mayors, sa ating mga vice mayors, sa atin pong mga councilors na nandito, maraming salamat po sa inyo. Hindi na po ako magtatagal para makakuwentuhan ko naman iyong bawat isa sa inyo. 

Maraming salamat po. [applause]