Brgy. Concepcion, Kabasalan, Zamboanga Sibugay 
delivered on 26 July 2019

Kumusta po kayo? Maayong hapon! [Audience: “Magandang hapon!”] Ako po, masayang-masaya na nakarating. Mula noong nakita ko iyong pelikula niyo—iyong pelikulang “Ka Dodoy”—gustong-gusto ko na talagang pumunta. 

Maraming dahilan kung bakit gusto kong pumunta. Tingin ko kasi iyong ginawa niyo dito, kailangang makita ng ibang fishing communities. [applause] Para makita nila na posible iyong ganito, ‘di ba? Marami na din po akong mga fishing communities na napuntahan. Pare-pareho ng reklamo: wala na ang isda, wala na ang hanapbuhay. Pero iyong ginawa niyo dito, parang imposible noong umpisa, ‘di ba? Imposible noong umpisa. Pero binuhay niyo ulit at marami iyong nakikinabang. 

Kaya ko po siya gustong puntahan kasi kahit napanood ko na iyong pelikula, iba kasi iyong pakiramdam kapag personal mong makita, ‘di ba? Maganda na iyong pelikula, pero mas maganda pa na iyong pagpunta ko… Maraming lugar na pupuntahan ko na maipapakita ko iyong pelikula niyo. Tingin ko lang, masyadong maiksi at baka mas may mahabang version na mapapanood. 

Napanood niyo na ba? Ay, hindi niyo napanood? [Audience: Napanood na…] [Ka Dodoy: Iyan pong version na sinasabi na maiksi ang hindi pa napapanood kasi walang internet. Ngayon, mahaba iyong original namin, doon nagmula iyong maliit.] Kokopya ako noong mahaba. [Ka Dodoy: Bibigay ko sa kay Ma’am.] Kasi gusto ko pong maipakita iyong ginawa ninyo. Iyon ang number one. 

Number two: Ganado kasi kaming tumulong kapag nakikita naming tinutulungan iyong sarili. Kaya iyong pagpunta namin, nandito na po iyong team kahapon pa. Pagpunta namin, titingnan namin ano iyong mga puwedeng itulong pa ng opisina namin. [applause] Kahit po hindi malaki iyong budget ng opisina, sigurado ako kahit papaano may maitutulong din kami. Kasi talaga namang… kailangan niyong tulungan, kasi tinutulungan niyo talaga iyong inyong sarili. 

Kanina noong nakasakay kami sa bangka, kinukuwento ni Ka Dodoy kung paano kayo nag-umpisa, papaano niyo… hinahanapan… Ang lakas na ng ulan! 

Kaya po gusto namin kayong i-congratulate. [applause] Sana hindi ito iyong huli na pagpunta namin.  Baka sa mga susunod [na pagpunta], may mga ipapadala kami rito para sila, personal din nilang makita. Hindi man kami makakatagal—kasi pabalik na po kami ng Manila ngayon; pupunta pa kami ng Zamboanga City—pero kami ay nagpapasalamat na nandito kayong lahat. 

Pasalamat kami kay Ka Dodoy, sa pagiging malaking inspirasyon sa amin. Kung may internet dito, panoorin niyo iyong pelikula kasi iyon iyong nagwagi sa… napakaraming entries at kayo iyong una doon. [applause] [Ka Dodoy points to a poster: “Ayon, Ma’am, sa likod oh.”] Ah, oo nga! 

Nakasama namin si Ka Dodoy ng maiksing panahon at ngayon, kami naman iyong pumunta. Pangalawang pagkakataon ko na pumunta sa Kabasalan. Nakapunta na po ako dito noong 2016. Noong eleksyon naman noong 2015, pumunta ako sa Ipil. Tapos ito, pangatlo—pangatlo na pagpunta ko sa Zamboanga Sibugay. 

Excited tayo sa marami pang… marami pang puwedeng makita sa darating na panahon. Sayang, sumama na iyong panahon. Gusto ko pa sanang umikot. Sabi ni Ka Dodoy hindi na puwede kasi masama na iyong panahon. [laughs] [Ka Dodoy: Pinapaikot na kami.]

Kaya ano, iyon, kaya maraming salamat sa inyo. Alam ko na marami kayong sakripisyo para maabot niyo ito, kung ano man iyong nandito ngayon. Pero parati namang iyong sakripisyo, nagbubunga. Kaya masaya kami. Iyong kuwento niyo, parating naming ikukuwento sa iba. 

Kaya maraming salamat. Hindi na po kami magtatagal. Magpapaalam na kami. Siguro hintayin lang namin na… hihintayin lang namin humina nang kaunti iyong ulan kasi hindi rin kami makakalipad. Pero maraming salamat! Congratulations! [applause]